Dumondas frequentas

Dumondas frequentas davart la parodontitis e nossas respostas.

Tras la placca bacteriala resulta in’inflammaziun a l’ur da la schunschiva (gingivitis) che po sa derasar sin l’entira fixaziun dals dents (parodontitis). Tras la paradentosa resultan tar la parodontitis a l’ur da la schunschiva uschenumnadas tastgas da la schunschiva sco er ina schluccada dals dents che po manar fin ad ina perdita da dents.

La gingivitis è ina malsogna d’inflammaziun limitada sin l’ur da la schunschiva entant che tar la parodontitis l’oss da la missella vegn sminuì supplementarmain. La differenza tranter la gingivitis e la parodontitis è che tar la gingivitis n’è anc nagina fixaziun dals dents vegnida sminuida. Uschia po tras ina buna igiena da la bucca a chasa la schunschiva cun ina gingivitis puspè guarir ad ina schunschiva sauna. Tar la parodontitis èsi auter: in oss da la missella ch’è ina giada sminuì tras l’inflammaziun, na po cun ina buna igiena da la bucca a chasa betg vegnir puspè construì dal corp sez.

Sch’ins na percorscha betg il cumenzament da la parodontitis, perd’ins entaifer paucs mais la fixaziun dals dents fitg preziusa. La buna igiena da la bucca regulara per prevegnir la gingivitis è e resta cun quai la meglra e la pli bunmartgada prevenziun da la parodontitis.

Betg mintga sminuziun da la schunschiva è resultada en consequenza d’ina parodontitis. Sche Vus avais ina sminuziun da la schunschiva, pon duas situaziuns vegnir tratgas en consideraziun:

Vus pudessas d’ina vart suffrir da recessiuns da la schunschiva. Quellas fissan sa furmadas tras lavar ils dents memia ferm. Tras la gronda forza dal barschun da dents vegn l’ur da la schunschiva adina puspè blessà. Tar sia guariziun sa sminuescha quel adina in zic pli fitg fin che la ragisch dal dent suten vegn libra. Era sche Vus midais l’igiena da la bucca e sche Vus vegnis a nettegiar Voss dents cun pli pauc forza, na vegn la recessiun da la schunschiva betg a sa revegnir.

La parodontitis è da l’autra vart ina malsogna d’inflammaziun ch’è sa sviluppada pervia da placcas bacterialas. Sche la parodontitis na vegn betg tractada, cuntinuescha la sminuziun da la fixaziun dals dents sut l’ur da la schunschiva. Tar la parodontitis è la sminuziun iniziala da la fixaziun dals dents betg visibla. Pir tar ina parodontitis pli avanzada va l’ur da la schunschiva enavos e Vus pudessas vesair quai sco ina sminuziun da la schunschiva, perquai che las surfatschas da la ragisch dals dents èn era latiers vegnidas libras.

Pir l’examinaziun en la pratica da dentist po As la fin finala dar la dretga resposta.

La parodontitis è ina malsogna d’inflammaziun ch’è sa sviluppada pervia da placcas bacterialas. Sch’ella na vegn betg tractada, cuntinuescha la sminuziun da la fixaziun dals dents, ch’è da l’exteriur invisibla, sut l’ur da la schunschiva. Quai è atgnamain il motiv, pertge che Vus na pudais betg identifitgar sezs la parodontitis.

Intgins segns da l’inflammaziun da la schunschiva (gingivitis) pudessas Vus dentant percorscher sezs: per l’ina po l’ur da la schunschiva esser da colur cotschna fin cotschna stgira ed in zic unflà e per l’autra pudess cumparair ina sanganada da la schunschiva durant lavar dents cun il barschun da dents u in fil dental. Tar fimaders ston ins far attent a che lur schunschiva ha ina tendenza pli pitschna da sanganar e ch’els pon cun quai sa sbagliar tar la valitaziun da sasez davart la parodontitis.

Percunter datti ils suandants segns d’ina parodontitis ch’ins po sez remartgar: sco tar la gingivitis pudess era tar la parodontitis la schunschiva esser in zic unflada ed avair ina colur cotschna. Cunquai che l’oss da la missella è dentant gia vegnì sminuì cun la parodontitis, fissan ils dents eventualmain gia in zic deplazzads ed i fissan sa sviluppads spazis dals dents libers. Tar ina parodontitis avanzada pudessan ils dents era vegnir pli movibels ed eventualmain pudess’ins constatar in nausch flad tras las bleras placcas bacterialas.

I dat plirs motivs, pertge che Vus pudessas avair parodontitis.

La placca bacteriala (placca, biofilm) è il motiv principal per la parodontitis. Intginas sorts da bacterias pon favurisar vinavant il svilup da la parodontitis. I pudess perquai esser che Vossa igiena da la bucca a chasa era per lung temp insuffizienta u che Vus essas cunzunt infestads da talas sorts da bacterias che pon favurisar il svilup da la parodontitis.

Ultra da quai pon vegnir tratgs en consideraziun facturs da ristga sco fimar, in nutriment malsanadaivel, in diabetes betg tractà u stress. La fin finala pudessan tar Vus era facturs genetics giugar ina rolla tar il svilup da la parodontitis, pertge sco che la defensiun immunitara reagescha en general sin las bacterias che fan vegnir malsaun, po esser different sin basa da las differenzas geneticas d’uman ad uman.

En in emprim discurs constatescha il dentist, sche Vus essas exponids a facturs da ristga eventuals. Facturs da ristga enconuschents per la parodontitis èn: igiena da la bucca a chasa insuffizienta, fimar, nutriment malsanadaivel, diabetes u stress.

Plinavant po il dentist u l’igienicra da dents exequir in’uschenumnada examinaziun parodontala curta che vegn a durar sulettamain paucas minutas.

Cun ina sonda da schunschiva (sonda parodontala) mesir’ins tar lieus tschernids plain resguard e cun ina precisiun dad in millimeter la profunditad da penetraziun a l’ur da la schunschiva.

Suenter questa examinaziun curta exequesch’ins scleriments ulteriurs mo lura, sch’ins chatta segns per ina sminuziun da la fixaziun dals dents. Quests scleriments cumpiglian l’uschenumnà status parodontal e radiografias supplementaras.

Vus pudais bain vegnir puspè sauns cun ina parodontitis, ma i na vegn betg esser pussaivel da metter la situaziun da Vossa schunschiva en il stadi original da pli baud.

La parodontitis è ina malsogna d’inflammaziun cun ina sminuziun da basa da la fixaziun dals dents. Tar la parodontitis betg tractada vegn questa fixaziun dals dents sminuida vinavant fin a la perdita dals dents. Effectivamain po il tractament da la schunschiva mo reducir u schizunt far ir davent l’inflammaziun. Questa situaziun vegn numnada sauna, cunquai ch’ils segns d’inflammaziun èn d’ina vart svanids e cunquai che da l’autra vart la sminuziun ulteriura da la fixaziun dals dents è vegnida reducida.

Suenter in tractament da la schunschiva è in success a lunga durada sur plirs onns mo lura garantì, sche pazients exequeschan in’igiena da la bucca a chasa optimala e sch’els impedeschan latiers quotidianamain che lur schunschiva po s’inflammar danovamain tras novas placcas bacterialas.

Per il success da lunga durada optimal è impurtanta ultra da quai l’assistenza da lunga durada professiunala permanenta tar l’igienicra da dents, per che pussaivels problems periodics possian vegnir identifitgads ed eliminads a temp.

Tenor novas retschertgas scientificas è la ristga per cumplicaziuns tar implantats dentals cleramain augmentada pervia da la parodontitis. Questas cumplicaziuns pertutgan en particular la fixaziun dals implantats dentals en l’oss da la missella. Sco tar la parodontitis po era tar l’implantat dental l’oss da la missella vegnir sminuì tras in’inflammaziun bacteriala. Questa malsogna vegn numnada periimplantitis. La terapia d’ina periimplantitis è per regla bler pli difficila che la terapia d’ina parodontitis. Ina periimplantitis betg tractada maina a la perdita da l’implantat pertutgà.

Igl existan dentant retschertgas scientificas che pon confermar che la ristga per la periimplantitis è remartgablamain pli pitschna suenter ina terapia da la schunschiva terminada cun success.

Sche Vus avais parodontitis, èsi pervia ils motivs menziunads indispensabel che la terapia da la schunschiva è d’ina vart terminada cumplettamain avant l’integraziun dals implantats dentals e da l’autra vart che Vus vegnis a resguardar regularmain l’assistenza da lunga durada professiunala, q.v.d. ils termins tar l’igienicra da dents.

Suenter in tractament da la schunschiva è in success a lunga durada sur plirs onns mo lura garantì, sche pazients exequeschan in’igiena da la bucca a chasa optimala e sch’els impedeschan latiers quotidianamain che lur schunschiva po s’inflammar danovamain tras novas placcas bacterialas.

Per il success da lunga durada optimal è impurtanta ultra da quai l’assistenza da lunga durada professiunala permanenta tar l’igienicra da dents, per che pussaivels problems periodics possian vegnir identifitgads ed eliminads a temp.

La distanza da questas sesidas d’igiena dentala munta il pli savens a trais, quatter u sis mais. La frequenza s’orientescha a la qualitad da l’igiena da la bucca, la dimensiun da l’inflammaziun da la schunschiva e l’existenza da las uschenumnadas restanzas da tastgas da la schunschiva.

Suenter in’allontanaziun da dent (extracziun) è la mucosa da la bucca e l’oss suten guarids cumplettamain suenter paucas emnas u paucs mais. La largia ch’è sa furmada tras l’allontanaziun da dent resta per regla per in lung temp nunmidada.

Pir suenter plirs mais pudessi capitar ch’ils dents da la correspundenta missella visavi – pervia ch’i als maunca il dent visavi correspundent – creschan ora (prolungheschan) da lur agen oss da la missella ed avanzan uschia en la largia en ils dents opposta.

En auters cas poi succeder ch’ils dents pli davos en la medema part da la missella cumenzan a s’inclinar (mesialisar) tras la largia en ils dents.

Sche la capacitad da mastgar sto vegnir stgaffida u curregida, duessan largias en ils dents cun u senza implantats dentals esser provedids cun substituziuns da dents en furma da protesas. La protesa po tut tenor pretensiuns e meds finanzials sa cumponer da curunas u punts fixadas ubain da protesas da cul d’in toc ch’ins po prender ora.

Vulais Vus ans trametter ina dumonda?

Nus vegnin ad empruvar d’As respunder il pli spert pussaivel.

Ulteriuras infurmaziuns

Vus pudais duvrar nossas infurmaziuns e nossas illustraziuns per Vossas atgnas producziuns. Resguardai latiers nossas disposiziuns da la licenza da Creative Commons:

Attribution-NonCommercial-ShareAlike 4.0
https://creativecommons.org/licenses/by-nc-sa/4.0/deed.de

Ils cuntegns da questa website vegnan citads cun la suandanta indicaziun:
www.parodont.ch/rm / CC-BY-NC-SA