Terapia da la parodontitis
Il nettegiament da dents professiunal en la pratica da dentist è l’emprim pass decisiv da la terapia d’ina parodontitis. Medemamain impurtant è d’adattar l’igiena da la bucca a chasa optimala ed ils termins da tractament posteriurs regulars tar l’igienicra da dents.
Nettegiament da dents professiunal
Per ch’ina parodontitis possia guarir, ston tut las cuvridas (placca e tartagl) vegnir allontanadas da las surfatschas dals dents cun in nettegiament da dents professiunal.
Tar il nettegiament da dents professiunal exequescha il dentist u l’igienicra da dents in nettegiament sistematic da tut las surfatschas dals dents. Cunzunt impurtant tar la parodontitis è da nettegiar e da calmar las surfatschas da las ragischs colonisadas cun bacterias sut l’ur da la schunschiva.
Medemamain vegnan allontanads tut ils impediments che pon engrevgiar l’igiena da la bucca a chasa optimala. Latiers tutgan particularmain cuvridas da tartagl sur l’ur da la schunschiva sco er urs da curuna u da plumba che pendan.
In’emprim nettegiament da dents professiunal po mo rar vegnir exequì en ina sesida. Per pazients cun ina parodontitis avanzada planisesch’ins plirs termins per il nettegiament da dents professiunal.
Igiena da la bucca a chasa
Per ch’i possia vegnir impedì che novas cuvridas da bacterias s’accumuleschan, ston pazients cun parodontitis emprender da nov da tegnair net lur dents en moda optimala.
D’exequir in’igiena da la bucca a chasa regulara optimala n’è betg adina simpel. Ina gronda sfida è per exempel il nettegiament dals spazis dals dents. Per quests lieus datti meds auxiliars d’igiena da la bucca spezials, uschenumnads barschuns interdentals. Quels vegnan elegids separadamain per mintga situaziun en la dentadira ed il dentist u l’igienicra da dents instruescha als pazients sco als duvrar endretg.
En il decurs dal tractament da la schunschiva emprendan pazients ina tecnica d’igiena da la bucca ch’è adattada per lur situaziun. Ina buna collavuraziun cun in’igiena da la bucca a chasa optimala decida davart il success da tractament cumplet.
Per ulteriuras infurmaziuns davart il tema instrucziun da l’igiena da la bucca era vesair www.mundhygiene-instruktion.ch.
Controlla posteriura (reevaluaziun)
Da in a dus mais suenter il nettegiament da dents professiunal vegn il resultat dal tractament examinà ed i vegn decidì sco che l’assistenza professiunala duai vegnir planisada vinavant.
Da in a dus mais suenter il nettegiament da dents professiunal vegn il resultat dal tractament examinà. Tar questa controlla posteriura vegn medemamain examinà, sche pazients pon nettegiar bain lur dents tras l’igiena da la bucca a chasa.
Tar ina buna igiena da la bucca a chasa pon vegnir spetgadas d’ina vart ina diminuziun clera da l’inflammaziun da la schunschiva e da l’autra vart ina sminuziun da la schunschiva. Era sche las surfatschas da las ragischs dals dents vegnan latiers libras, duess’ins mesirar en cas ideal pli paucas restanzas da tastgas da la schunschiva cun valurs da sondagi restants cun dapli che 3 mm. En quests cas pon ins terminar il tractament da la schunschiva e la situaziun guarida po vegnir tgirada vinavant en moda professiunala cun termins regulars tar l’igienicra da dents.
Tractament chirurgic ulteriur
En situaziuns cun ina parodontitis fitg avanzada pon las restanzas da tastgas da la schunschiva pli profundas per regla pir vegnir reducidas cun success tras in tractament chirurgic.
Sch’ins chatta suenter l’emprim nettegiament da dents professiunal anc plinavant restanzas da tastgas da la schunschiva cun dapli che 5 mm, pon las cuvridas da tartagl ch’èn là anc savens preschentas vegnir allontanadas meglier cun in tractament chirurgic. Supplementarmain pon ins curreger conturas da la schunschiva ed en intgins cas pon ins schizunt empruvar da reconstruir ils tessids perdids cun agid d’uschenumnads materials biologics (regeneraziun da tessids dirigida).
Tractaments da la schunschiva pli cumplexs duran savens dapli ch’in onn. Pertutgads ston chapir l’andament da questa terapia e tge finamiras che pon vegnir cuntanschidas cun quella. Ina buna collavuraziun dals pazients cun ina buna igiena da la bucca a chasa, in stop da fimar u ina midada da nutriment èn latiers inevitabels.
Assistenza da lunga durada professiunala (tractament posteriur, recall)
Suenter in tractament da la schunschiva planisesch’ins l’assistenza da lunga durada professiunala tar l’igienicra da dents. La frequenza da questas sesidas s’orientescha er a las uschenumnadas restanzas da tastgas da la schunschiva.
Suenter in tractament da la schunschiva è in success a lunga durada sur plirs onns mo lura garantì, sche pazients exequeschan in’igiena da la bucca a chasa optimala e sch’els impedeschan latiers quotidianamain che lur schunschiva po s’inflammar danovamain tras novas placcas bacterialas.
Per il success da lunga durada optimal è impurtanta ultra da quai l’assistenza da lunga durada professiunala permanenta tar l’igienicra da dents, per che pussaivels problems periodics possian vegnir identifitgads ed eliminads a temp.
La distanza da questas sesidas d’igiena dentala munta il pli savens a trais, quatter u sis mais. La frequenza s’orientescha a la qualitad da l’igiena da la bucca, la dimensiun da l’inflammaziun da la schunschiva e l’existenza da las uschenumnadas restanzas da tastgas da la schunschiva.
Effects secundars pussaivels d’in tractament parodontal
Effects secundars enconuschents d’in tractament da la schunschiva èn il svilup da spazis dals dents libers e la sensibilitad augmentada da las surfatschas da la ragisch dals dents libras.
Durant il nettegiament da dents professiunal percepeschan ils pazients ils mals fitg different. En general reagescha ina schunschiva inflammada pli sensibel ch’ina sauna. Igl è impurtant da savair che l’entir tractament da la schunschiva po vegnir exequì sut narcosa locala (anestesia locala).
In ulteriur effect secundar dal tractament da la schunschiva è la sminuziun dals urs da la schunschiva suenter il nettegiament da dents professiunal. Per regla maina questa sminuziun a spazis dals dents libers ed ina sensibilitad augmentada da las surfatschas da la ragisch dals dents sin temperaturas fraidas u spaisas aschas. Questa sensibilitad augmentada sa reducescha per regla puspè suenter paucs mais.
Tgi po exequir il tractament parodontal?
L’emprim nettegiament da dents professiunal po vegnir exequì dal dentist privat e da l’igienicra da dents. Tar ina parodontitis gravanta è recumandada l’assegnaziun al medi spezialist per parodontologia.
Il dentist svizzer vegn durant ses studi scolà e controllà teoreticamain e praticamain tar l’examinaziun ed il tractament da la parodontitis. Cun questa scolaziun è el abel da tractar sez cas che n’èn betg memia fitg avanzads. En curs da furmaziun supplementara ed autras occurrenzas che vegnan purschidas da las universitads, da la societa svizra per parodontologia [Schweizerische Gesellschaft für Parodontologie (SSP)] ed autras instituziuns, pon questas enconuschientschas da basa vegnir profundadas.
Il tractament da cas difficils – latiers tutgan en particular malsognas parodontalas ch’avanzan svelt tar giuvenils e creschids – dumonda enconuschientschas spezialas ed in’infrastructura che garantescha in’assistenza da lunga durada parodontala nuninterutta. Tals pazients po il dentist privat (dentist da famiglia) transferir ad in parodontolog.
Ulteriuras infurmaziuns
Vus pudais duvrar nossas infurmaziuns e nossas illustraziuns per Vossas atgnas producziuns. Resguardai latiers nossas disposiziuns da la licenza da Creative Commons:
Attribution-NonCommercial-ShareAlike 4.0
https://creativecommons.org/licenses/by-nc-sa/4.0/deed.de
Ils cuntegns da questa website vegnan citads cun la suandanta indicaziun:
www.parodont.ch/rm / CC-BY-NC-SA