Prevenziun da la parodontitis

Senza ina placca bacteriala na datti betg in’inflammaziun da la schunschiva (gingivitis) e senza gingivitis na datti betg ina parodontitis. In’igiena da la bucca a chasa permanenta optimala, l’allontanaziun regulara da tartagl en la pratica da dentist, in nutriment saun sco er eventualmain in stop da fimar èn las mesiras las pli impurtantas per prevegnir la parodontitis.

Per che tant la gingivitis sco la parodontitis pon vegnir prevegnidas en moda optimala, duai vegnir examinada regularmain la schunschiva en la pratica da dentist e lieus eventualmain chattads cun segns d’inflammaziun u tastgas da la schunschiva vegnir tractads immediatamain.

Anteriurs fimaders han enturn lur dents pli pauc perdita da la fixaziun dals dents e cun quai pli paucas tastgas da la schunschiva che fimaders. Suenter il stop da fimar dovra il parodont in pau temp per sa revegnir dal consum da tabac. In onn suenter il stop da fimar vegn il grad da grevezza da l’inflammaziun da la schunschiva ad esser main marcant e 10 onns suenter il stop da fimar na ston ins betg pli extrair ils dents pervia il fimar.

Anterius fimaders reageschan ultra da quai bler meglier sin il tractament da la schunschiva e numerus tractaments chirurgics ch’èn savens necessaris pon mo vegnir exequids tar nunfimaders u tar anterius fimaders.

Per ulteriuras infurmaziuns davart il tema instrucziun da l’igiena da la bucca era vesair www.mundhygiene-instruktion.ch.

D’ina vart vegn l’optimaziun dal nutriment per prevegnir ina malsogna da diabetes era directamain prevegnir la ristga da sviluppar ina parodontitis. Persunas cun diabetes mellitus senza controlla da lur livel dal zutger en il sang han ina ristga cleramain augmentada da survegnir ina parodontitis.

Da l’autra vart vegn la reducziun d’in nutriment ritg da grass ed idrats carbonics era a rinforzar la defensiun immunitara, tge che po chaschunar ina reducziun dals segns d’inflammaziun e cun quai ina meglra guariziun.

L’examinaziun annuala tar il dentist pussibilitescha d’intervegnir en moda professiunala uschè baud sco pussaivel, sche necessari.

Sche la parodontitis vegn percurschida baud e sch’ins cumenza gia baud cun la terapia necessaria, po in’ulteriura perdita da la fixaziun dals dents vegnir impedida cun success.

La finamira sto restar da vegnir cun ils agens dents en l’auta vegliadetgna. „In’examinaziun memia bler è meglier ch’in tractament memia pauc!“

Suenter in tractament da la schunschiva è in success a lunga durada sur plirs onns mo lura garantì, sche pazients exequeschan in’igiena da la bucca a chasa optimala e sch’els impedeschan latiers quotidianamain che lur schunschiva po s’inflammar danovamain tras novas placcas bacterialas.

Per il success da lunga durada optimal è impurtanta ultra da quai l’assistenza da lunga durada professiunala permanenta tar l’igienicra da dents, per che pussaivels problems periodics possian vegnir identifitgads ed eliminads a temp.

La distanza da questas sesidas d’igiena dentala munta il pli savens a trais, quatter u sis mais. La frequenza s’orientescha a la qualitad da l’igiena da la bucca, la dimensiun da l’inflammaziun da la schunschiva e l’existenza da las uschenumnadas restanzas da tastgas da la schunschiva.

Vus pudais duvrar nossas infurmaziuns e nossas illustraziuns per Vossas atgnas producziuns. Resguardai latiers nossas disposiziuns da la licenza da Creative Commons:

Attribution-NonCommercial-ShareAlike 4.0
https://creativecommons.org/licenses/by-nc-sa/4.0/deed.de

Ils cuntegns da questa website vegnan citads cun la suandanta indicaziun:
www.parodont.ch/rm / CC-BY-NC-SA